Act 7 | NdeIBE | STEP | Yikho umphristi ophezulu wasembuza wathi, “Ukumangalelwa konke lokhu kuliqiniso na?”

Acts 7

Inkulumo KaStefane ESanihedrini

1 Yikho umphristi ophezulu wasembuza wathi, “Ukumangalelwa konke lokhu kuliqiniso na?”

2 Kulokhu waphendula wathi: “Bafowethu labobaba ake lingilalele! UNkulunkulu wenkazimulo waziveza kubaba wethu u-Abhrahama esahlala eMesophothamiya, engakahlali eHarani. 3 UNkulunkulu wathi, “Tshiya ilizwe lakini labantu bakini uye elizweni engizakutshengisa lona.’

4 “Ngakho wasuka elizweni lamaKhaledi wayahlala eHarani. Ngemva kokufa kukayise, uNkulunkulu wamletha kuleli ilizwe lapho eselihlala khona manje. 5 Kamuphanga lifa lapha loba nje isigcawana somhlabathi. Kodwa uNkulunkulu wamthembisa ukuthi yena lezizukulwane zakhe ngemuva kwakhe babezalizuza ilizwe lelo libe ngelabo, loba nje ngalesosikhathi u-Abhrahama wayengelamntwana. 6 UNkulunkulu wakhuluma laye kanje: ‘Izizukulwane zakho zizakuba ngabezizweni elizweni elingayisilo labo, njalo bazagqilazwa, bahlukuluzwe okweminyaka engamakhulu amane. 7 Ngizasijezisa lesosizwe esizabenza izigqili,’ kusitsho uNkulunkulu, ‘kuthi phambili bazaphuma kulelolizwe bangikhonze kuyonale indawo.’ 8 Wasenika u-Abhrahama isivumelwano sokusoka. UAbhrahama waba nguyise ka-Isaka, wamsoka ngemuva kwezinsuku ezificamibili ezelwe. Ngemuva kwalokho u-Isaka waba nguyise kaJakhobe, uJakhobe yena waba nguyise wabokhokho abalitshumi lambili.

9 “Ngenxa yokuthi okhokho baba lomhawu ngoJosefa, bamthengisela eGibhithe njengesigqili. Kodwa uNkulunkulu waye laye

10 wamophula kuzozonke izinhlupho zakhe. Wanika uJosefa inhlakanipho wamenza wathandwa nguFaro, inkosi yaseGibhithe; yasimenza umbusi eGibhithe lakuso sonke isigodlo sakhe.

11 “Kwathi indlala yalihlasela lonke elaseGibhithe leleKhenani, kwaba lobunzima obukhulu ngokuba okhokho bethu bakuswela ukudla. 12 UJakhobe esezwile ukuthi amabele ayekhona eGibhithe wathuma okhokho bethu beqalisa ukuya khona. 13 Sebesiya okwesibili uJosefa wabatshela abanewabo ukuthi wayengubani, njalo uFaro waziswa ngabakibo kaJosefa. 14 Ngemva kwalokho uJosefa wasebiza uyise uJakhobe ukuthi eze labendlu yakhe bonke, kungabantu abangamatshumi ayisikhombisa lanhlanu sebe bonke. 15 Yikho uJakhobe wasesehlela kweleGibhithe lapho afela khona yena kanye labokhokho bethu.

16 Izidumbu zabo zabuyiswa eShekemu zabekwa ethuneni elathengwa ngu-Abhrahama kumadodana kaHamori eShekemu ngemali ethile.

17 “Kwathi isikhathi sesisondele esokuthi uNkulunkulu agcwalise isithembiso sakhe ku-Abhrahama, inani labantu bakithi eGibhithe landa ngamandla. 18 Kwasekusithi enye inkosi eyayingazi lutho ngoJosefa yaba ngumbusi eGibhithe. 19 Yaba lesihluku ebantwini bakithi, yacindezela okhokho bethu ngokubabamba ngamandla ukuthi balahlele khatshana izinsane zabo ezisanda kuzalwa ukuthi zife.

20 “Kulesosikhathi uMosi wazalwa, njalo engasumntwana makhaza. Okwezinyanga ezintathu wondliwa endlini kayise. 21 Kwathi esebekwe phandle indodakazi kaFaro yamthatha yamkhulisa njengomntanayo.

22 UMosi wafundiswa kuyo yonke inhlakanipho yamaGibhithe, eligagu lokukhuluma lokwenza.

23 “Kwathi uMosi eseleminyaka engamatshumi amane ubudala, wathi usake ethekelele aba-Israyeli bakibo. 24 Wabona omunye wabo echukuluzwa ngumGibhithe, yikho wayamlamulela, wenanisa ngokubulala umGibhithe lowo. 25 UMosi wakhumbula ukuthi abantu bakibo babezakunanzelela ukuthi uNkulunkulu wayemsebenzisa ukuthi abakhulule, kodwa kabakunanzelelanga.

26 Ngosuku olulandelayo uMosi wawela phezu kwaba-Israyeli ababili ababesilwa. Wazama ukubalamula ngokuthi, ‘Madoda, lingabafowenu; kungani lidutshuzana kangaka na?’

27 “Kodwa leyondoda eyayimkhulela omunye yamfuqela eceleni uMosi yathi, ‘Ngubani okubeke ukuba ngumbusi lomahluli phezu kwethu na? 28 Ufuna ukungibulala njengomGibhithe ombuleleyo izolo?’ 29 UMosi wathi ekuzwa lokho wabalekela eMidiyani, lapho ahlala khona njengesizwe, wazala khona amadodana amabili.

30 “Sekwedlule iminyaka engamatshumi amane, ingilosi yavela kuMosi iselangabini lesixuku esibhebhayo enkangala eduze kweNtaba iSinayi. 31 Wathi ekubona lokhu wamangala kakhulu ngalowombono. Wathi uyasondela ukuthi abonisise, wezwa ilizwi leNkosi lisithi: 32 ‘NginguNkulunkulu waboyihlo, uNkulunkulu ka-Abhrahama, lo-Isaka loJakhobe.’ UMosi wathuthumela ngokwesaba wehluleka ukukhangela.

33 “Yikho iNkosi yasisithi kuye, ‘Khumula amanyathela akho; indawo omi kuyo ingumhlabathi ongcwele. 34 Ngempela sengikubonile ukukhahlamezeka kwabantu bami eGibhithe. Sengikuzwile ukububula kwabo ngakho sengizile phansi lapha ukuzabakhulula. Manje-ke zwana, ngizakubuyisela eGibhithe.’

35 “Nguye kanye uMosi lo ababemalile ngamazwi athi, ‘Ngubani owakwenza umbusi lomahluli na?’ Wathunyelwa ukuba ngumbusi lomkhululi nguNkulunkulu yena ngokwakhe, ngengilosi eyabonakala kuye isesixukwini.

36 Wabakhokhela baphuma eGibhithe wenza izimanga lemimangaliso eGibhithe, oLwandle Olubomvu lokweminyaka engamatshumi amane enkangala. 37 Nguye lo uMosi owatshela aba-Israyeli wathi, ‘UNkulunkulu uzalithumela umphrofethi onjengami ephuma ebantwini bakini.’ 38 Wayekanye lebandla enkangala, elabokhokho bethu njalo elayo ingilosi eyakhuluma kuye eNtabeni yaseSinayi; njalo wemukela amazwi okuphila ukuthi awedlulisele kithi.

39 “Kodwa okhokho bethu bala ukumlalela. Kodwa bamala, kwathi ezinhliziyweni zabo babuyela eGibhithe. 40 Batshela u-Aroni bathi, ‘Yenza onkulunkulu abazasikhokhela. UMosi lo owasikhupha eGibhithe asisakwazi ukuthi usedliwe yini!’ 41 Yiso lesosikhathi abenza ngaso isithombe esasilesimo sethole. Baletha imihlatshelo kulo, benza umkhosi wokuthakazelela lokho okwenziwa yizandla zabo. 42 Kodwa uNkulunkulu wabafulathela wabakhalala ukuba bakhonze izindilinga zomkhathi. Lokhu kuvumelana lalokho okulotshiweyo encwadini yabaphrofethi ukuthi: “ ‘We ndlu ka-Israyeli, langilethela na imihlatshelo leminikelo ngeminyaka engamatshumi amane enkangala?

43 Hatshi, lathwala isikhonzelo sikaMoleki lenkanyezi kankulunkulu wenu uRefani, izithombe elazenzayo ukuthi lizikhonze. Ngakho-ke ngizalixotshela ekuthunjweni’ ngale kweBhabhiloni.

44 “Okhokho bethu babelalo ithala lobufakazi enkangala. Lalenziwe njengokuqondiswa kukaMosi nguNkulunkulu elandela isimo ayesibonile. 45 Sebelamukele ithala okhokho bethu bengaphansi kukaJoshuwa beza lalo ekuthumbeni kwabo. Lahlala elizweni kwaze kwaba yisikhathi sikaDavida, 46 owathandwa nguNkulunkulu, wacela ukuthi alungisele uNkulunkulu kaJakhobe indawo yokuhlala.

47 Kodwa kwaba nguSolomoni owamakhelayo leyondlu.

48 “Kodwa oPhezukonke kahlali ezindlini ezakhiwe ngabantu. Njengoba esitsho umphrofethi ukuthi:

49 “ ‘Izulu liyisihlalo sami sobukhosi, umhlaba uyisenabelo sami. Lizangakhela ndlu bani? kutsho iNkosi. Kumbe izaba ngaphi indawo yami yokuphumula na?

50 Izinto zonke lezi kazenziwanga yisandla sami na?’

51 “Lina ziqholo zabantu, abanhliziyo zingasokanga lezindlebe zingakleklanga! Lifuze oyihlo: Lihlezi lijamelene loMoya oNgcwele!

52 Kambe kwake kwabakhona umphrofethi oyihlo abangazange bamchukuluze na? Baze bababulala labo abafanisa ngokuza koLungileyo. Khathesi selimnikele lambulala –

53 lina eseliwemukele umthetho ngezingilosi kodwa kaliwulahlanga.”

UStefane Ukhandwa Ngamatshe

54 Sebekuzwile lokhu bazonda bafuthelana bamgedlela amazinyo. 55 Kodwa uStefane egcwele uMoya oNgcwele wakhangela ezulwini wabona inkazimulo kaNkulunkulu loJesu emi esandleni sokunene sikaNkulunkulu. 56 wathi, “Khangelani, ngibona izulu livuliwe leNdodana yoMuntu imi esandleni sokunene sikaNkulunkulu.”

57 Besizwa lokhu bagcika izindlebe zabo, baklabalala, bamdumela 58 bamhudulela phandle kwedolobho bamkhanda ngamatshe. Ofakazi babeka izigqoko zabo phambi kwejaha elalithiwa nguSawuli.

59 Kwathi belokhu bemkhanda uStefane wakhuleka wathi, “Nkosi Jesu, yamukela umoya wami.” 60 Wathi khubembe ngamadolo phansi wamemeza wathi, “Nkosi, ungababekeli umlandu ngalesisono.” Kuthe esetsho lokho walala.